مکئی

مکئی کی سفارش کردہ اقسام

تحقیقاتی ادارہ مکئی، جوار،باجرہ یوسف والا (ساہیوال)کی تیار کردہ موزوں و جدید اقسام اور ان کی خصوصیات

عام اقسام (Synthetic Varieties)

ہائبرڈ اقسام  (Hybrids Varieties)

  ہائبرڈاقسام

ہائبرڈاقسام بہتر پیداواری صلاحیت رکھتی ہیں کیونکہ ان کی چھلیاں آخری سرے تک دانوں سے بھری ہوئی ہوتی ہیں، چھلیوں میں دانوں کی تعداد زیادہ ہوتی ہے،دانے موٹے اور وزنی ہوتے ہیں،ان اقسام کا  قد درمیانہ تنا اور جڑیں مضبوط ہوتی ہیں، جس کی وجہ سے یہ زیادہ کھاد برداشت کر لیتی ہیں اور گرنے سے محفوظ رہتی ہیں۔

ہائبرڈاقسام سے متعلقہ ضروری گزارش      
مندرجہ بالا اقسام کے علاوہ مارکیٹ میں بین الا قوامی اورقومی کمپنیوں کی تیار کردہ ہا ئبرڈ اقسام بھی دستیاب ہیں۔ کاشتکار وںسے گذارش ہے کہ سفارش کردہ اقسام رجسٹرڈ کمپنیوں کے رجسٹرڈ ڈیلروں سے ہی خریدیں اور ان سے پکی رسید حاصل کریںنیز بوائی کے بعد بیج والے خالی تھیلوںکو سنبھال کر رکھیں تاکہ کسی شکایت کی صورت میں کام آ سکیں۔اقسام کا بیج خریدتے وقت ان کے متعلقہ لٹریچر ضرور حاصل کریں۔  
شرح بیج
 شرح بیج 8تا 10کلو گرام فی ایکڑ رکھیں۔ بیج صاف ستھرا، صحت مند، خالص اور 90 فیصدسے زائد روئیدگی والا ہوناچاہیے۔
 بیج کو زہر لگانا
 ابتدائی مرحلے میں رس چوسنے والے کیڑوں خصوصاً کونپل کی مکھی کے حملہ سے بچاؤاور فصل کو بیماریوں  کے حملہ سے بچانے کے لئے  بیج کو ایزوکسی سٹروبن+ کلوتھیانیڈن 62.5فیصد بحساب 9گرام فی کلو گرام بیج یا ایزوکسی سٹروبن+کلوتھیانیڈن +  فلوڈی آکسی نل72فی صد بحساب 9گرام فی کلو گرام بیج یاامیڈا کلوپرڈ + ٹیبو کونازول 37.25 فی صد بحساب 10 ملی لٹر فی کلوگرام بیج کولگا کر کاشت کریں۔

مکئی کی سفارش کردہ ہائبرڈ اقسام

وی ای سی (Variety Evaluation Committee on Maize)،پی  اے آر  سی ،اسلام آبادنے اپنی مختلف میٹنگز میں مکئی کی ہائبرڈ اقسام کی سفارش کی ہے جن کی تفصیل درج ذیل ہے۔

وقت کاشت

بہاریہ فصل کے لئے بہترین وقت کاشت آخر جنوری تاآخر فروری اورخریف کاشت کے لئے 15 جولائی تا15 اگست ہے۔راولپنڈی کے پہاڑی علاقوں میں مکئی کی کاشت جولائی کے پہلے ہفتہ میں کریں۔بدلتے موسمی حالات کے تناظر میں موسمی مکئی کو قدرے لیٹ کاشت کرنے کی سفارش کی جاتی ہے۔

وقت کاشت کے متعلق اہم نقاط

• موسمیاتی تبدیلیوں کے پیش نظر وقت کاشت میں تبدیلی کرلیں۔
• سبز بھٹوں کیلئے مکئی آخر اگست تک کاشت کی جاسکتی ہے۔
• اٹک، جہلم، راولپنڈی اور گجرات کے بارانی علاقوں میں مکئی کی بوائی مون سون کے آغازکے مطابق کریں۔
• بارانی اور پہاڑی علاقوں میں مکئی کے بعد آنے والی فصل کو مدِِنظر رکھتے ہوئے  اگیتی اقسام کواْن کے اگیتے پن کے تناسب سے کاشت کریں۔

زمین کا انتخاب

بھاری میرا،گہری زرخیززمین جس میں نامیاتی مادہ کی مقداربہترہو اور پانی جذب کرنے کی صلاحیت اچھی ہو، مکئی کی کاشت کے لئے نہایت موزوں ہے۔ ریتلی، سیم زدہ،کلراٹھی اور نیز سخت تہہ (Hard Pan) والی زمین  اس کی کاشت کے لئے موزوں نہیں۔

زمین کی تیاری

فصل کی کامیابی کا پہلا قدم اس کا اچھا اگاؤ ہے  اس لئے مکئی کی کاشت سے قبل کھیت کا اچھا تیار ہونا ضروری ہے۔اگر زمین میں سخت تہہ موجود ہو تو اسے توڑ لیا جائے۔ اس مقصد کے لئے گہرا ہل استعمال کریں۔  پہلی مرتبہ مٹی پلٹنے والا ہل ضرور چلائیں۔ اگر ممکن ہو تو بہتر ہے کہ مٹی پلٹنے والا ہل کاشت سے ایک تا ڈیڑھ مہینہ پہلے چلائیں۔ اس کے ساتھ ساتھ کھیت کی ہمواری کا خصوصی اہتمام کریں کیونکہ ہموار کھیت ہی پانی کے بہتر استعمال اور بہتر پیداوار کا ضامن ہے۔ زیادہ بہتر ہے لیزر لینڈ لیولر سے زمین ہموار کریں۔زمین کی بہتر تیاری کے لئے تین تاچار مرتبہ ہل اور سہاگہ چلائیں۔زمین میں اگر سابقہ فصل کے مڈھ یا ڈھیلے ہوں تو روٹا ویٹر چلا کر انھیں باریک کرلیں۔

طریقہ کاشت

مکئی کی کاشت درج ذیل طریقوں سے کامیابی سے کی جا سکتی ہے۔
 وٹوں پر کاشت
  آبپاش علاقوں میں مکئی کی کاشت کا بہتر طریقہ یہ ہے کہ اڑھائی فٹ کے باہمی فاصلہ پر شرقاً غرباً وٹیں بنائی جائیں اور ہلکا پانی لگانے کے فوراً بعد ریز پہنچنے سے پہلے پہلے وٹوں کی ڈھلوان پر ایک ایک بیج کا چوکا کردیں۔بہاریہ کاشت میں وٹوں کی جنوبی سمت (صبح سے شام تک دھوپ پڑنے سے بیج جلدی اُگتا ہے) اور خریف کاشت میں شمالی سمت(دھوپ کم پڑنے سے نمی زیادہ دیر برقراررہتی ہے اور اُگاؤ اچھا ہوتا ہے) پرچوکا لگائیں۔بہاریہ مکئی میں ہائبرڈ اقسام کو 6انچ اور عام اقسام کو 7تا8انچ کے فاصلہ پر کاشت کریں اور خریف کاشت میں ہائبرڈ اقسام کو 7انچ کے فاصلہ پر جبکہ عام اقسام کو 8تا9انچ کے فاصلہ پر کاشت کریں۔
 پٹڑیوں پر کاشت
 آبپاش علاقوں میں مکئی پٹڑیوں پر بھی کاشت کی جاتی ہے۔اس طریقہ کاشت میں مکئی کو ساڑھے تین فٹ کے باہمی فاصلہ پر بنائی گئی پٹڑیوں پر کاشت کیا جاتا ہے۔اس صورت میں مکئی کے بیج کا چوکا پٹڑیوں کی دونوں اطراف لگائیں۔بہاریہ مکئی میں ہائبرڈ اقسام کو 8تا9انچ اورعام اقسام کو 10تا11انچ کے فاصلہ پر کاشت کریں اور خریف کاشت میں ہائبرڈ اقسام کو 10انچ کے فاصلہ پر جبکہ عام اقسام کو 11تا12انچ کے فاصلہ پر کاشت کریں۔
 قطاروں میں کاشت
 اچھی پیداوار کے لیے بارانی علاقوں میں مکئی اڑھائی فٹ کے فاصلہ پر ڈرل،پلانٹر،پوریا کیرا سے کاشت کی جاتی ہے۔ فصل کا قد جب4تا6انچ ہوجائے تو کمزور اور بیمار پودے نکال کر چھدرائی کریں۔تھوڑے دنوں میں پک کر تیار ہونے والی اقسام میں پودوں کا باہمی فاصلہ 6تا7انچ رکھیں۔ دیر سے پکنے والی اقسام کے لیے پودوں کا درمیانی فاصلہ 7تا8انچ رکھیں اور باقی پودے نکا ل دیں۔
پودوں کی سفارش کردہ فی ایکڑتعداد
 بھرپور پیداوار حاصل کرنے کے لئے پودوں کی فی ایکڑ سفارش کردہ تعداد کا پورا ہونا بے حد ضروری ہے۔لہٰذا کاشتکاروں سے گزارش ہے کہ مکئی کے پودوں کی تعداد کو پورا کریں۔

مکئی کی اہم بیماریاں اور ان کا انسداد

(1)نوزائیدہ پودوں کے امراض ( Seed and Seedling diseases )

اس بیماری کی وجہ سے بیج یا توزمین میں اُگنے کے بعدباہر نکلتا ہی نہیں یا اُگنے کے بعد اس کا سائز3 تا 9 انچ ہو, مُرجھا کر ختم ہو جاتا ہے۔زمین  میں موجود مختلف قسم کی فنجائی اس بیماری کا سبب بنتی ہیں۔

طریقہ انسداد

•  بیج کوسفارش کردہ پھپھوند کُش زہر لگا کر کاشت کرنے سے اس بیماری پر قابو پایا جا سکتا ہے۔

تنے کی سڑن (Stalk Rot)

مکئی کے تنے کی سڑ ن کی بیماری ایک عام پائی جانے والی خطرناک بیماری ہے۔ پودوں کا گلنا سڑنا عام طور پر نیچے سے دوسری پور سے شروع ہوتا ہے۔ بیماری سے متاثرہ حصہ سے خاص قسم کی بو آتی ہے۔ بیماری کی شدت سے پتے پیلے ہونا شروع ہو جاتے ہیں اور سوکھ جاتے ہیں۔ پودے متاثرہ پور سے گل سڑ کر زمین بوس ہو جاتے ہیں۔ اس بیماری میں اگرپودا زمین بوس نہ ہو تو چھلیاں نیچے کی جانب جھک جاتی ہیں۔ دانے چھوٹے اور پچکے ہوئے رہ جاتے ہیں۔ جس سے پیداوار میں خاطر خواہ کمی واقع ہو جاتی ہے۔مکئی کے تنے کی سڑن کی ذمہ دار مندرجہ ذیل مختلف پھپھوندیاں اور بیکٹریا ہیں۔

1. ایروینا کرائی سینتھیمی (Erwinia crysanthamae)
2. میکروفومینافیزی اولینا (Macrophomina phaseolina)
3. سیفالو سپوریم میڈس(Cephalosporium maydis)

طریقہ انسداد 

• تنے کی سڑن کے خلاف قوت مدافعت رکھنے والی اقسام کاشت کریں۔
• کھیت کی زرخیزی کو متوازن رکھا جائے اور خصوصی طور پر زمین میں پوٹاش کی کمی نہ ہونے دی جائے۔
• نائٹروجنی کھادیں ضرو رت سے زیادہ استعمال نہ کریں۔
• بیماری سے متاثرہ کھیتوں میں اگلے چند سالوں کے لئے مکئی کی کاشت نہ کریں اور فصلوں کوادل بد ل کر کے کاشت کریں۔
•  بیج کو سفارش کردہ پھپھوندی کش زہر لگا کر کاشت کریں۔
• مکئی کی فصل برداشت کرنے کے بعد باقیات کو جلد از جلد تلف کر دیں۔
• پودے سے پودے اور کھیلیوں کا باہمی فاصلہ سفارش کردہ رکھیں۔
• فصل کو پانی ضرورت کے مطابق لگائیں اور بارشوں کا زائد پانی کھیت سے فوری نکال دیں۔
• بڑھوتری کے کسی بھی مرحلے میں متاثرہ پودوں کو جڑوں سمیت نکال کر تلف کریں۔

کانگیاری(Smut of maize)

مکئی کی کانگیاری کی بیماری اسٹی لاگو میڈس (Ustilago maydis) نامی پھپھوندی کے حملہ آور ہونے سے وقوع پذیر ہوتی ہے۔  یہ شمالی علاقہ جات میں مکئی کی ایک خطرناک بیماری ہے۔

بیماری کی علامات

حملہ آور پھپھوندی متاثرہ پودوں پر سفید یا سیاہی مائل ابھار (galls) بنا دیتی ہے۔ یہ ابھا ر(galls) نر حصے‘ پتوں اور کونپلوں پر بھی نمودار ہو تے ہیں۔ ابھاروں کے پکنے پر ان کے اوپر کی جھلی پھٹ جاتی ہے تو اندر سے پھپھوندی کے بیجوں (Spores)  پر مشتمل سیاہ رنگ کا پاؤڈر نمودار ہوتا ہے۔جب یہ ابھار بھٹے پر بنتے ہیں تو بھٹے میں دانے نہیں بنتے اور پیداوار میں کمی واقع ہو جاتی ہے۔

طریقہ انسداد

• بیماری کے خلاف قوت مدافعت رکھنے والی اقسام کاشت کی جائیں۔
• متاثرہ کھیتوں میں اگلے چند سالوں کے لئے مکئی کی فصل کاشت نہ کی جائے۔
• متاثرہ کھیتوں سے فصل کے بچے کھچے حصوں کو اکٹھا کرکے جلا دیا جائے۔
• بیج کو پھپھوندی کش زہر لگا کر کاشت کریں۔

پتوں کا جھلساؤ (Leaf blight of maize)

مکئی کے پتوں کے جھلساؤ کی ذمہ دار پھپھوندیوں میں قابل ذکر ہیلمن تھو سپوریم ٹرسی کم (Helminthosporium turcicum)، ہیلمن تھوسپوریم میڈس(Helminthosporium maydis) ہیں۔ یہ بیماری نہ صرف فصل کی پیداوار میں خاطر خواہ کمی کا باعث بنتی ہے بلکہ مویشیوں کے لئے بطور خوراک چارہ کی کوالٹی میں بھی کمی کا باعث بنتی ہے۔

بیماری کی علامات

اس بیماری کی علامات پتوں پر چھوٹے بڑے بھورے اور سفیدی مائل دھبوں کی شکل میں نمودار ہوتی ہیں۔ جو 6 انچ تک پتے کی لمبائی کے رخ پھیل سکتے ہیں۔

طریقہ انسداد

• مکئی کی وہ اقسام کاشت کی جائیں جو بیماری کے خلاف قوت مدافعت رکھتی ہو ں۔
• پچھلے سال کی متاثرہ فصل کی باقیات کو تلف کر دیا جائے۔
• بیماری کی صورت میں محکمہ زراعت توسیع کے عملہ کے مشورہ سے مناسب زہر کا سپرے کریں۔

مکئی کے بھُٹوں کی سڑن (Ear and grain rot)

مکئی کے بھُٹوں کی سڑن کی ذمہ دار بہت سی پھپھوندیاں ہیں جن میں ڈپلوڈیامیڈس (Diplodia maydis) فیوزیریم (Fusarium sp.) ‘ نائیگرو سپور ا اُورایزی (Nigrospora  oryzae) ‘پینی سیلیم (Penicillium sp.)‘ اسپر جیلس (Aspergillus sp.) قابل ذکر ہیں جو فصل کی پیداوار‘ دانوں کی کوالٹی اور ان کی غذائی اہمیت کو کم کرتی ہیں۔ یہ بیماری تقریباً ہر کھیت میں کم و بیش ملتی ہے اور اس بیماری سے ہونے والے پیداواری نقصانات کی شرح کا انحصار زیادہ تر بارشوں کی مقدار اور عرصے پر ہوتا ہے اگر بھٹوں کے پکنے کے دنوں میں بارشیں زیادہ ہو ں گی تو سڑن کی شر ح میں اضافہ ہوجائے گا۔ علاوہ ازیں بھٹوں کے اندر سوراخ کرنے والے حشرات (کیڑے‘ سنڈیاں) اور کمزور تنے والی اقسام کا بارش اور ہواؤں سے گر پڑنا بھی بھٹوں کی سڑن میں اضافہ کا باعث بنتے ہیں۔ مکئی کے وہ بھٹے جو پردوں میں ڈھکے رہتے ہیں بیماری سے کم متاثر ہوتے ہیں۔

طریقہ انسداد 

• کمزور تنے اور بارشوں و ہواؤں سے گرنے والی اقسام کاشت نہ کی جائیں۔
• مکئی کے بھٹوں کی سڑن کے خلاف قوت مدافعت رکھنے والی اقسام کاشت کی جائیں۔
• کھیت کی زرخیزی کو مناسب مقدار میں کھاد ڈال کر متوازن رکھا جائے۔
• بھٹوں کے اندر سوراخ کرکے گھسنے والے کیڑوں کو سفارش کردہ کیڑے مارزہر کا سپرے کرکے کنٹرول کریں۔
• فصل کی برداشت کے بعد کھیت میں پڑے ہوئے پودوں کے بچے کھچے حصوں کو اکٹھا کرکے جلا دیا جائے۔

مکئی کی فصل کے ضرر رساں کیڑوں کا مربوط طریقہ انسداد 

جڑی بوٹیوں کاانسداد

فصل کی بھرپور پیداوار حاصل کرنے کے لئے جڑ ی بوٹیوں کی تلفی انتہائی ضروری ہے۔ ایک اندازے کے مطابق بعض صورتوں میں جڑی بوٹیوں کی وجہ سے مکئی کی پیداوار30 تا 50 فیصد تک کم ہوسکتی ہے۔ چھوٹے پیمانے پر کاشتہ فصل میں جڑی بوٹیوں کے انسداد کے لئے گوڈی بھی کی جاسکتی ہے۔ کیمیائی  انسداد کے لئے بوائی کے وقت ایٹرازین+ایس میٹولا کلور720 ایس سی بحساب800 ملی لٹر یا اگاؤ کے بعد ایک ماہ کے اندر اندر میزو ٹرائی اون +ایٹرازین 48 ایس سی بحساب650 ملی لٹر فی ایکڑ سپرے کریں۔ اگر ڈیلا کنٹرول  نہ ہو تو میزو ٹرائی اون+ایٹرازین کی سپرے دو سری مرتبہ کی جاسکتی ہے۔

آبپاشی

 عموماََمکئی کی بہاریہ فصل کو 12تا14جبکہ خریف کاشتہ فصل کو 10تا12پانی درکار ہوتے ہیں۔

آبپاشی سے متعلق ہدایات

• ہموار کھیت میں کاشتہ فصل کو پہلی آبپاشی اگاؤ کے 10تا12 دن بعدجبکہ وٹوں پر کاشتہ فصل کو اُگاؤ تک وتر میں رکھیں۔
• پھول آنے،،عملِ زیرگی اور دانے کی دودھیا حالت میں فصل کو سوکا نہ آنے دیں۔
• شدید گرمی میں آبپاشی کا وقفہ کم کر دیں اوردرجہ حرارت میں کمی ہونے پر یہ وقفہ بڑھا دیں۔
• بارش کے بعد فالتو پانی فورََا کھیت سے نکال دیں۔
• عمل زیرگی کے دوران فصل کو  سوکا نہ لگنے دیں۔ پانی کی کمی کی صور ت میں ہاف اریگیشن لگائیں یعنی  ایک کھیلی چھوڑ کر دوسری میں پانی لگائیں۔ یہ عمل صرف وٹوں پر کاشتہ فصل میں کیا جا سکتا ہے۔ پٹریوں پر کاشتہ فصل میں ہر کھیلی کو سیراب کرنا ضروری ہے۔

کیمیائی کھادوں کا استعمال

 فصل کے لئے کھاد کی ضرورت کا اندازہ زمین کی بنیادی زرخیزی، کلراٹھا پن، اس کی قسم اور نوعیت، دستیاب پانی کی کوالٹی، مختلف فصلوں کی کثرت کاشت اور پچھلی فصل بنیادی عوامل ہیں جن کی بنا پر کیا جا سکتا ہے۔ اس کے لئے زمین کا لیبارٹری تجزیہ کروائیں اورسفارش کردہ کھادوں کا استعمال کریں۔میٹھی مکئی (Sweet Corn) اور  پھْلے بنانے والی مکئی (Pop Corn)  کے لئے کھادیں عام اقسام کے لئے دی گئی شرح کے مطابق استعمال کریں۔

ہائبریڈ اقسام کے لئے کھادوں کی سفارشات

عام اقسام کے لیے کھادوں کی سفارشات (آبپاش علاقے)

عام اقسام کے لیے کھادوں کی سفارشات (بارانی علاقے)

 کھادوں کے استعمال سے متعلق ہدایات

• بوائی سے ایک ماہ پہلے گوبر کی گلی سڑی کھاد بحساب 9 تا 12ٹن (3سے4 ٹرالی)  فی ایکڑ ڈالیں۔
• بوائی کے وقت ڈالی جانے والی کھاد کھیلیاں بنانے سے قبل ڈالیں۔
• بارانی علاقوں میں سفارش کردہ کھاد کی ساری مقدار بوائی کے وقت ڈالیں۔

 زنک اور بوران کا استعمال

 مکئی کی فصل میں 21%زنک سلفیٹ بحساب 10کلوگرام یا 33%زنک سلفیٹ بحساب 6کلوگرام  جبکہ  بوریکس (11 فیصد  بوران) بحساب 3 کلو گرام فی ایکڑاستعمال کریں یا ان کے متبادل کوئی دوسرا مرکب استعمال کریں۔

غذائی عناصر کی کمی کی علامات

نائٹروجن

نائٹروجن کی کمی کی صورت میں پودوں کی بڑھوتری رک جاتی ہے۔ پتوں کا رنگ پیلا ہونا شروع ہوجاتا ہے۔ زیادہ کمی کی صورت میں پرانے پتے زیادہ متاثر ہوتے ہیں اور ان کے بعد یہ علامات نئے پتوں پر نظر آتی ہیں۔ پتے میں پیلاہٹ اس کے نوکدار سرے سے شروع ہوکر چوڑے حصے کی طرف جاتی ہے۔ پتے بعد میں بھورے رنگ کے ہوجاتے ہیں۔

فاسفورس

پودے کی بڑھوتری رک جاتی ہے۔ جڑوں کا نظام کمزور رہ جاتا ہے۔ پتوں کے نوکدار سرے ارغوانی رنگ کے ہوجاتے ہیں۔ پتہ گہراسبز نظر آتا ہے۔

پوٹاش

شروع میں پوٹاش کی کمی کی صورت میں پتوں پر سفید نشان پڑ جاتے ہیں جو بعد میں بھورے ہوجاتے ہیں۔

فصل کی برداشت

جب چھلیوں کے اندرونی پردے خشک ہو جائیں،دانے چمک دار اور سخت ہو جائیں، دانوں میں ناخن نہ چبھ سکے اور اگر دانے چھلی سے اُکھاڑ کر دیکھے جائیں تو ان کے نوک دار سرے سیاہ یا بھورے رنگ کے ہو چکے ہوں تو سمجھ لیا جائے کہ فصل عضویاتی طور پر پک (Physiologically Mature)  چکی ہے  اور برداشت کے لیے تیار ہے۔اس وقت دانوں میں نمی تقریباً 30سے 35فیصد تک ہوتی ہے۔اس مرحلہ پر فصل برداشت کر لینی چاہیے۔اگر مندرجہ بالا علامات ظاہر ہونے سے پہلے مکئی برداشت کر لی جائے یعنی کچی توڑ لی جائے تو دانوں کی مکمل بھرائی(Grain Filling)نہیں ہوتی نتیجتاً پیداوار کم ہو جاتی ہے۔اس کے علاوہ  اگر اسے بطوربیج استعمال کیا جائے تواس کا اُگاؤ متاثر ہوتا ہے۔اسی طرح اگرفصل پکنے کے بعد بروقت برداشت نہ کی جائے تو فصل کے گرنے اور پرندوں کے کھانے کی وجہ سے نقصان کا احتمال ہوتا ہے۔ اگر فصل گرنے کے بعد بارش ہو جائے تو پھپھوندی لگنے سے دانے خراب ہو جاتے ہیں۔

جنس کوذخیرہ کرنا

جنس ذخیرہ کرنے کے لئے سٹور کو اچھی طرح صاف کر کے اس میں سفارش کردہ  زہر سپرے کریں اور چار گھنٹوں کے لیے دروازے اور کھڑکیاں بند کر دیں تاکہ سٹور میں موجود کیڑے ختم ہو جائیں۔ مکئی کو چھلیوں یادانوں کی صورت میں سٹور کیا جا سکتا ہے۔  اگر  سٹور میں پہلے سے کوئی جنس  موجود ہو تو اس سے علیحدہ  رکھیں۔سٹور میں رکھی گئی مکئی کو اس کے استعمال کے لحاظ سے یعنی دانے منڈی میں فروخت کرنے کے لئے اور بیج کے استعمال کے لئے الگ الگ لیبل لگائیں تاکہ کسی قسم کی غلطی کا احتمال نہ ہو۔موسم برسات میں جنس کو کیڑوں سے بچانے کے لیے ایلومینیم فاسفائیڈ کی 30تا35گولیاں فی ہزار مکعب فٹ حجم استعمال کریں اور سٹور کو کم از کم ایک ہفتہ تک بند رکھیں۔

توسیعی سرگرمیاں

اہداف
 صوبائی حکومت ہرضلع میں مکئی کے زیرکاشت رقبہ کاہدف وفاقی حکومت کی منظوری سے مقررکرے گی۔
اشاعت پیداواری منصوبہ
 توسیعی سرگرمیوں کے سلسلے میں  پہلا قدم مکئی کے پیداواری منصوبہ کی اشاعت ہے۔اس میں مکئی کی کاشت کے بنیادی اصو ل تفصیل سے درج کئے گئے ہیںتاکہ توسیعی کارکنان ان کے مطالعہ سے کاشتکار کی بہتر خدمت کرسکیں۔  
حکمت عملی
 ڈپٹی ڈائریکٹرزراعت (توسیع) اپنے ضلع میں مکئی کی پیداوارمیں اضافہ کے بارے میں مربوط حکمت عملی مرتب کرے گا۔اس کے بارے میں ضلعی اورصوبائی انتظامیہ کومطلع کرے گااوراپنے تمام عملے کودیئے گئے اہداف کے حصول کے لیے متحرک کرے گا۔
ریفریشر کورسز کا انعقاد
 محکمہ زراعت کے توسیعی عملے اور کاشتکاروں کے لئے ضلع اور تحصیل کی سطح پر ریفریشر کورسز منعقد کئے جائیں گے۔ جن میں ماہرین زراعت مکئی کی کاشت کے بارے جدید ٹیکنالوجی سے روشناس کروائیں گے۔
پیسٹ وارننگ و کوالٹی کنٹرول
 محکمہ زراعت کا فیلڈ سٹاف مکئی کے کھیتوں کا دورہ کرتا رہے گا۔ جہاں کہیں کیڑوں کا حملہ معاشی حد سے زیادہ مشاہدہ میں آئے گا۔ کاشتکاروں کو مطلع کر دیا جائے گاتاکہ کاشتکار اس کا سد باب کر سکیں۔
 کسانوں کے لئے تربیتی پروگرام
 ڈپٹی ڈائریکٹر زراعت تحصیل و مراکز کی سطح پر تربیتی پروگراموں کے ذریعے توسیعی عملہ اور کاشتکاروں کو مکئی کی فصل کے متعلق حالات اور علاقے کی مناسبت سے ضروری تربیت فراہم کرے گا۔فصل کے تمام مراحل پر پیش آنے والے زرعی مسائل کا مسلسل جائزہ لیاجاتا رہے گا اور زرعی کارکنان کے ذریعے ان کا مناسب حل تلاش کرکے کاشتکاروں تک پہنچایاجائے گا۔تشہیری مہم
 نظامت زرعی اطلاعات پنجاب مکئی کی کاشت سے برداشت تک کے مراحل میں کاشتکاروں کی فنی رہنمائی کے لیے پرنٹ والیکٹرانک و سوشل میڈیاکے ذریعے تشہیری مہم جاری رکھے گا۔

مکئی کی پیداوار بڑھانے کے لئے اہم عوامل

• مکئی کی کاشت کے لئے بھاری میرااورگہری زرخیززمین کا انتخاب کریں جس میں نامیاتی مادہ کی مقداربہترین ہو اور پانی جذب کرنے کی صلاحیت اچھی ہو۔
• زمین کی اچھی تیاری کے لئے تین تا چارمرتبہ ہل اور سہاگہ چلائیں۔ پہلی مرتبہ مٹی پلٹنے والا ہل ضرور چلائیں اور اگر زمین میں سخت تہہ(Hard pan)موجود ہو تو اسے گہرا ہل چلا کر توڑلیں نیززمین کی ہمواری  کے لئے لیزر لینڈ لیولر کا استعمال کریں ۔
• محکمہ کی منظور شدہ ترقی دادہ  ہائبرڈ اقسا م ایف ایچ1046-،وائی ایچ 1898-، وائی ایچ 5427- ،ایف ایچ988اوروائی ایچ 5482-جبکہعام اقسام ملکہ۔16، گوہر19،ساہیوال گولڈ، سمٹ پاک، سویٹ1- اورپاپ1-کاشت کریں۔اس کے علاوہ  بین الاقوامی اور قومی کمپنیوں کی سفارش کردہ ترقی دادہ ہا ئبرڈ اقسام بھی کاشت کی جا سکتی ہیں۔
• سفارش کردہ ہائبرڈاقسام کا بیج رجسٹرڈ  فرموں کے رجسٹرڈ ڈیلروں سے ہی خریدیں اور ان سے پکی رسیدحاصل کریں نیز بوائی کے بعد بیج والے خالی تھیلوں کو سنبھال کر رکھیں تاکہ کسی شکایت کی صورت میں کام آ سکیں۔
• صحت مند بیج کو سفارش کردہ پھپھوندی کُش و حشرات کُش زہرلگا کر کاشت کریں۔
• مکئی کی کاشت اڑھائی فٹ کے باہمی فاصلے پر بنائی گئی وٹوں پر کریں اور ان کے ایک طرف بیج کا چوکا کریں یا ساڑھے تین فٹ کے باہمی فاصلے پر بنائی گئی پٹڑیوں پر کریں اور پٹڑیوں کے دونوں طرف بیج کا چوکا لگائیں۔بارانی علاقوں میں کاشت بذریعہ ڈرل،پور  یا کیرا کریں۔
• بہاریہ فصل آخر جنوری تاآخر فروری اورخریف میں 15 جولائی تا15 اگست کاشت کریں۔راولپنڈی  کے  پہاڑی علاقوں میں مکئی کی کاشت جولائی کے پہلے ہفتہ میں کریں۔
• شرح بیج 8 تا10کلوگرام فی ایکڑ رکھیں۔
• پودوں کی تعداد ہائبرڈاقسام کے لئے بہاریہ کاشت میں تقریباً 35 ہزار اورخریف کاشت میں 30ہزار جبکہ عام اقسام کے لئے بہاریہ کاشت میں 26تا 30 ہزاراور خریف کاشت میں 23تا 26ہزار فی ایکڑ رکھیں۔